lo nuzba zo'u pa plini be lo ci mei solri cu talsa loi kesyskepre

ni'o lo kesyskepre ba'o zgana pa plini be pa solri na.e lo ci mei solri be'o poi panra da pe ra'i la'o gy Star Wars gy .i lo se go'i cu talsa lo ve ti'icki be lo pu'u loi plini cu se zbasu zi'o bei fo loi kesyskepre .i lo go'i cu gapci tcebra gi'e bramau la IUpiter gi'e plini lo ralju tarci po'e lo ci mei tarci ciste be me'e la'o tarc HD188753 tarc po'e zoi lat tcignus lat poi targri zi'e poi lo ke'a cmene cu se fanva fu lu lo cipnrtcigni li'u .i tu'e lo ni lo ci mei tarci e lo ri plini cu darno lo terdi cu xextre ji'i li 1 pi 4 .i lo ni lo ci mei tarci cu darno lo ri plini cu jibni lo ni lo terdi cu darno lo xavyplini tu'u .i la'e di'u cu selsku lo merko skepre de'i lo mumdei fi'o karni la'o gy Nature gy

ni'o tu'e lo sanli da'i be lo sefta be lo plini cu viska da'i ci solri vi lo tsani .i to'e ri'a nai bo lo plini cu co'e lo ralju je pelxu tarci .i lo brarai lo'i re drata solri cu narju da'i .i lo cmarai cu xunre da'i tu'u .i la'e di'u cu se ci'asku lo kesyskepre po la balcu'e be la kalifornias bei lo mi'irlarcu

ni'o cumki fa lo nu lo cnino selfa'i cu natfe lo cabna ve ti'icki no'u lo du'u lo plini pi so'e roi jalge lo nu lo gapci joi pulce cu mo'i ru'u muvdu pa po'o tarci .i je bo cumki fa lo nu lo cnino selfa'i cu mukti lo nu lo skepre cu sisku tu'a lo plini vi lo tolselcta ke kensa stuzi .i lu se ni'i ku lo ni zasti plini cu zmadu lo ni selji'i zasti plini li'u cu se ci'asku

ni'o la matceis konatskis poi kesyskepre vi by ky my zi'e poi co'e lo karni selfi'i cu terme'e lo cnino klesi be loi plini be'o lu loi me la tatu,In me'u plini li'u .i mu'i bo lo jvinu be lo tsani bei ko'a cu simsa lo jvinu be lo tsani bei la tatu,In pe se ra'i la luk skAI,ualkr po lo pa moi skina pe po'i la'o gy Star Wars gy

ni'o lo du'u lo plini ka'e co'e lo su'o re tarci ciste kei cu se manci du'o la konatskis .i zi'o cu fadni lo ka su'o re mei tarci ciste kei lo'i tarci co jibni be le solri .i su'a loi su'o re mei tarci ciste cu zmadu loi pa mei tarci ciste lo ka klani kei li ji'i re no ce'i .i ku'i pu je ca ku so'e plini be loi na'e solri cu ba'o se zgana ta'i lo nu sisku lo ka slilu kei lo'i tarci .i lo nunslilu cu selri'a lo zu'o loi solri cu juntytri lo plini be ri .i lo tadji cu sadme'a ma'i loi su'o re mei tarci ciste .i lo si'o lo nu loi plini cu se zbasu zi'o vi lo jai ma'i go'i cu tolyla'e cu cabna ve ti'icki .i la konatskis facki lo du'u lo plini ka'e se zgana ta'i lo nu merli lo nilsutra joi farna pe ro dacti be ma'i lo su'o re mei tarci ciste

lo nuzba zo'u lo dafcau nabmi be la ainctain bei lo panpi tertu'i selkri cu tolmipri

ni'o lo xatra be lo ponjo pendo bei la albert ainctain goi ko'a be'o poi na pu se gubgau cu ciksi lo nu ri bandu ri se ra'a lo ratydi'e jbama nungunta be fi la xirocymas ce la nagasakis be'o noi cumbi'o se ja'e lo selgu'a be ko'a

ni'o la sei,eis cino'aras poi nau morsi cu fanva fi lo do'orbau lo ponbau gi'e pijyskepre gi'e ru'i se xatra fi la ainctain ca'o lo fanmo nanca poi ko'a ze'a ke'a jmive .i lo sy cy fetspe cu jdice lo du'u gubgau loi xatra .i mu'i bo ba zi detke'u lo re po'o ratydi'e nungunta ku li xa no

ni'o lo du'u la ainctain cu fapro lo ratydi'e nunjamna cu gubni selju'o .i je ku'i loi xatra be la cino'aras bei ko'a cu ciksi lo nu ko'a troci lo nu matygau lo ri panpi tertu'i selkri lo ri zu'o saske gunka .i lo nu xatra simta'a cu cfari de'i li 1953 .i ca zi bo la cino'aras cu te xatra la ainstain fo lo se du'u cy tolzaupai ko'a lo du'u ko'a pagbu zbasu loi ratydi'e xarci .i ko'a spuda te xatra fo la'e di'e se pi'o lo penbi ti'a lo se batkyci'a xatra .i lo dotco panra be lu mi pu ro roi faprysku lo nu gunta lo pongu'e se pi'o lo jbama be lo ratydi'e .i je ku'i mi na ka'e zukte fi lo nu fanta lo nu le ja'erkai cu pu se jdice li'u cu ve xatra la cino'aras la ainctain

ni'o lo cabna'a cu detke'u lo nu la ainctain cu ti'icki lo si'o kamsorselmanri kei kei li pa no no .i lo si'o kamsorselmanri cu tcevajni lo pu'u lo mergu'e cu zbasu lo jbama be lo ratydi'e .i lo nu gunta la xirocymas cu rinka lo nu mrobi'o fa ji'i 140 ki'o prenu poi xadba loi xabju .i lo nu gunta la nagasakis cu rinka lo nu mrobi'o fa za'u 70 ki'o prenu ba ze'a lo djedi be li ci .i lo dotco panra be lu pe'i lo du'u lo fanta selri'a ba jinga kei e lo du'u lo ka terdi jecta snura cu ba sutra banro kei e no drata cu jdikygau lo li'i mi badri lo nu loi jbama be lo ratydi'e cu se zbasu li'u za'u re'u ve xatra fi la ainctain .i je ku'i la ainctain noi lo du'u ke'a xebro lo ka se krasi cu mukti lo nu ke'a cliva lo do'orgu'e de'i li 1933 cu cusku ji'a lo se du'u so'o roi zanru lo nunjamna .i lo dotco panra be lu mi pu ciska ge nai lo se du'u mi panpi tertu'i ke ba'e mulno krici gi lo se du'u mi pu je ca ro roi panpi tertu'i ke ba'e selbirti krici .i pe'i la'e di'u cu se smuni lo du'u so'o roi bilga lo nu jamna kei mu'u lo nu mi fapro da poi zukte fi lo nu daspo mi joi lo mi natmi li'u cu se ciska ko'a