lo nuzba zo'u la soluanas na xarpei lo nu lo ropno ke seltra jicmu be ma'i lo nu la irAn capru lo ratydi'e nejni cu ba se stika

ni'o la xavIEr soluanas goi ko'a zi'e poi ralja'a lo drata jecta ke seltra jicmu po lo ropno jecta gunma cu jdice lo du'u ri ba na'e suksa stika lo ri jicmu co seltra be fi lo nu la irAn cupra lo ratydi'e nejni kei kei ca lo pavdei ba lo nu cuxna la maxmud axmadinedjad lo'i jecta ralja'a djica ca lo jefyfa'o .i ry jy gy cu pu je ba sarxe la xasan roxanis poi ralju jansu be la irAn bei fo lo ratydi'e nejni be'o ku'o lo ka tertu'i ne'i la jynev ca lo nu lo mumymasti cu ca'o mulbi'o kei cu'u ko'a .i lu mi'a pu za friti lo nu se cumki lo nu mi'a stidi da poi kamtcila ku'o lo turni be la irAn ca lo nu lo zelmasti cu ca'o mulbi'o kei te zu'e lo nu ty lanli sy .i no da nau mukti lo nu mi'a stika li'u se cusku ko'a lo karnysku

ni'o ne'i la uacintyn ca lo zeldei la gerard creder poi dotco ralja'a cu cusku lo nu ry jy gy cu bilga lo nu stidi da poi cnino ku'o te zu'e lo nu sisti lo nu toltu'i la irAn fo lo ri ratydi'e nejni selpla .i je ku'i la soluanas cusku lo du'u cy tavla fi lo mintu selpla no'u lo nu stidi da poi cnino ku'o ca lo zelmasti .i lu lo selti'i be la creder zo'u na'e cnino .i mi'a jdice lo du'u stidi lo mintu kei de'i li 5 pi'e 25 ne'i la jynev .i ba bo mi'a penmi la roxanis gi'e friti .i fi lo se jdice fa lo dotco ralja'a cu tavla li'u se cusku ko'a

ni'o la banli ci mei pe ry jy gy ge'u no'u lo ritygu'e e lo fasygu'e e lo dotygu'e cu tavla la irAn lo nu ri sisti lo nu platu fi lo nu cumpo'igau lo jinmrvurani .i lo go'i joi lo mergu'e cu jinvi lo du'u lo selpla cu tolstace velmipri lo nu zbasu lo ratydi'e xarci kei vo'a .i la irAn noi vo moi be loi gugde bei lo ni vecnu lo ctile cu cusku lo se du'u lo nu lo ni dikca cu bazbi'o cu terzu'e lo zu'o platu