lo nuzba zo'u lo du'u lo renvi co xadni be la kopernik cu ba'o te facki cu se gubjungau

ni'o su'o re gugrpolski tolci'oce'uskepre cu cusku lo se du'u birti lo si'o ba'o facki fi loi bongu be fi la kopernik i ri kesyskepre je jdaca'i ca lo 16 moi ctona'a i ky pu stidi lo si'o lei plini cu jincarna lo solri e nai lo terdi i ja'e bo ky mutce stika lo kesyske

ni'o la iejis gasofskis noi balcu'e ctuca cu cusku fi lo balcu'e se nunjmaji fe lo se du'u krici lo si'o lo xadni renvi poi pu te facki ni'a lo selfityjbu be ne'i la frombork poi balmalsi vi lo xaskoi be la balt bei la polsk cu renvi co xadni la kopernik

ni'o lo nilci'o be lei bongu be'o ku e su'o re loi flira selkai cu mukti lo nu la gasofskis cu cusku lu ia cai mi birti lo si'o le xadni renvi bi'u nai cu renvi co xadni la kopernik kei la'u li 97 ce'i i je ku'i lo jgina cipra po'o ba kakne lo nu mulno birtygau fi lo se krici li'u

ni'o lo skami cu xanri zbasu lo pixra be le stedu ji'u lo sedbo'u i lo nu go'i cu jarco lo stedu be le nanmu poi grusi se kerfa zi'e poi pu ba'o jmive ze'u lo nanca be li 70 i la kopernik pu ca'o jmive ze'u lo nanca be li 70 ca lo mu'e vo'a mrobi'o i lo pixra be fo lo skami cu mapti su'o re lo cabna pixra be ky bei fo lo cinta lo ka ce'u jarco lo skapi velxai barna be ga'u lo zunle kanla be'o ku e lo nazbi poi ba'o porpi

ni'o la kopernik cu rirni no da poi te djuno i je ku'i lo nu loi xadni be loi morsi lazmi'u be ra ba sabji lo jgina mupli cu cumki

ni'o la kopernik pu birti cusku lo se du'u le ro plini cu jincarna lo solri kei ku e lo se du'u lo terdi cu na midju lo munje kei fi'o prosa se cukta lu srana lo nu lo kensa dacti cu jincarna li'u